|
Velo fala na Voz de Galicia |
|
|
|
escrito por Colaboración
|
|
viernes, 15 de septiembre de 2006 |
Un día despois da súa destitución como membro do executivo de Boiro, Manuel Velo aseguraba onte sentirse «liberado». Argumentaba que por fin se atopa no bando que a el máis lle gusta: «Non teño que ser cómplice das aberracións do Goberno e iso súbeme o ánimo». Comentaba que non se arrepinte de ter formado parte do Executivo, pero recoñece que, se puidera retroceder no tempo, non tería actuado do mesmo xeito.
-Volvería a apoiar a Deira para que fora alcalde, pero manteríame á marxe do Goberno. Nestes anos tiven a oportunidade de coñecer a fondo ás persoas ás que elevei ao cargo que hoxe ocupan (en referencia a Xosé Deira e a Juan Jesús Ares).
-¿Arrepíntese entón de ter formado parte do Executivo? -Non exactamente, máis ben estou descontento coa xestión. Eu estívenme queimando igual que os líderes dos outros grupos, pero as miñas propostas non saíron adiante.
-¿Que proxectos tiña? -Por exemplo, lograr o apoio de Arousa Norte para conseguir que a serra de Barbanza fora declarada parque natural. Expúxeno cando Deira era presidente da mancomunidade e nin sequera quixo sometelo a debate. El foi o que torpedeou os meus proxectos, e algúns deles nin sequera supoñían investimento algún.
-¿Por que cre que non se tiveron en conta as súas achegas? -Nun principio xestionabamos entre todos os proxectos máis importantes, como o centro social de Cabo de Cruz, a apertura da gardería ou a ampliación do polígono industrial. Entón todo marchaba ben. Despois Deira empeñouse en absorbelo todo e aí comezaron os problemas, xa que meteu todo no caixón.
-¿Vai abandonar o seu despacho na casa consistorial? -Non. Os grupos políticos temos dereito a un local nas instalacións municipais e eu quero ocupar o meu porque, dende a oposición, vou seguir traballando na defensa dos intereses dos cidadáns.
-¿Ten xa decidido se vai concorrer ás vindeiras eleccións locais? -De momento aínda non o sei, concorrerei ás eleccións se os cidadáns me apoian. Gústame a política local, pero para continuar nela teño que comprobar que os cidadáns comprenderon o meu posicionamento co convenio de Eroski.
-Entón, ¿vai dedicar os vindeiros meses a pulsar a opinión da sociedade? -Si, de feito xa estou analizando agora a situación para saber que opinan os veciños do meu comportamento. O que está claro é que eu optei por correr un risco, xa me quedei sen salario, para cumprir coa miña obriga de defender os intereses dos cidadáns.
-¿Tivo contactos con algún partido político para que o apoie nos vindeiros comicios? -Non, houbo agrupacións que tiveron contactos comigo. Tanto o Partido Galeguista como Terra Galega me expuxeron formar unha lista, polo que, se finalmente decido presentarme, non vou ter problemas.
-¿E houbo contactos para que non concorra ás eleccións? -Si. O PSOE tivo conversas comigo para que non presente unha candidatura, pero eu pedinlle encabezar a súa. Penso que Ares non vai ser capaz de facer o cambio estrutural que fai falla en Boiro.
-¿Pensa que pode volver a ser a chave do vindeiro goberno de Boiro? -Por suposto, non me cabe dúbida algunha. O BNG e o PSOE están obcecados e non o queren ver, pero a realidade é a que é. |
|
Modificado el ( viernes, 15 de septiembre de 2006 )
|
