Desde o acceso á Xunta dos mesmo socios que gobernan en Boiro, non se viu ningún xesto de apoio de ningunha consellería para limitar as esixencias da firma vasca. é máis, desde que Eroski é propietaria, o conxunto arquitectónico de Goiáns foise deteriorando progresivamente sen que nin o Concello nin a Xunta fagan nada por impedilo.
Eroski xa estaba nunha situación xurídica precaria co seu anterior convenio. Pero desde este martes, coa entrada en vigor da lei de protección do litoral, a súa potencia negociadora achegábase a cero, porque toda a contorna resulta afectado. E moi probablemente, a paralización cautelar da edificación convértase en definitiva se Urbanismo actúa en consecuencia co que di defender. Pero, aínda por riba, gran parte da área de intervención da Pedreira tamén está afectada pola lei. 
En suma, o goberno de Boiro acaba de permutar chan presuntamente edificable en proporción un a tres, o que xa é grave, cando en realidade se descoñece o valor real dun e outro chan, o que é gravísimo. Pódese dicir que estamos ante un novo e singular convenio, un convenio virtual con valor a futuro. Será obxecto de estudo nos departamentos universitarios de toda Galicia pola súa novidade. Logo de asistir ás explicacións dos responsables locais de urbanismo non me queda máis que dar as grazas ao BNG pola súa xenerosidade ao dicir no seu slogan electoral que o ten todo pensado para min. Pero de momento, e co seu permiso, eu seguirei pensando pola miña conta.
Penso nun goberno forte e digno para o meu pobo, cun goberno ao seu servizo que invalide esta tolemia. E brindaremos con licor café.